Во рамки на Едриличарската федерација на Северна Македонија, активно се практикуваат три дисциплини кои го опфаќаат спортското, тактичкото и рекреативното едрење. Секоја дисциплина носи посебно искуство на вода – од интензивни трки до опуштени пловидби. Во продолжение, запознајте се со нив:
Трки во група (Fleet Racing)
Трките во група се најраспространета форма на натпреварувачко едрење. Во оваа дисциплина, повеќе едрилици истовремено се натпреваруваат на претходно дефинирана патека.
Трките во група се делат на:
- Tрки со монотипни едрилици (One Design) – сите едрилици се идентични, што значи дека победникот се одредува исклучиво според вештините на екипажот.
- Хендикеп трки – различни типови едрилици се натпреваруваат со прилагодени резултати врз основа на систем за хендикеп, кој ги изедначува шансите.
Се одржуваат повеќе трки во еден ден, а пласманот се одредува според збирот на освоените места во секоја трка.
Меч Рејс (Match Racing)
Меч Рејс претставува дуел помеѓу две идентични едрилици – директно натпреварување еден на еден. Главната цел е едноставна: кој прв ќе ја мине целната линија.
- Секоја трка трае околу 20 минути, на патека со насока во ветер и заедно со ветер.
- Четири минути пред стартот започнува интензивна тактичка борба, каде двете екипи се обидуваат да изнудат грешка од противникот или да освојат подобра стартна позиција.
- Трките се следени од судии на вода, кои донесуваат одлуки во моментот кога настанува одредена ситуација.
Крузинг (Cruising)
Крузингот претставува рекреативна форма на едрење која опфаќа дневни пловидби покрај брегот, и долгорочни пловидби преку отворено море. Но круизирањето не е секогаш само за уживање – сè почесто се организираат и натпревари, кои комбинираат авантура со спортски дух.
- Крузинг-трките се одвиваат на подолги дистанци и вклучуваат стратегии за навигација, временски услови и тимска координација.
- Во рекреативната форма, круизирањето нуди слобода, истражување и поврзување со природата.